पुणे : लहान बाळांना कायमच्या अंधत्वापासून वाचवण्यासाठी पुण्यातील एच. व्ही. देसाई नेत्र रुग्णालयाने केलेल्या कामाची दखल इंग्लंडच्या राणीने घेतली असून, लंडनच्या बकिंगहॅम पॅलेसमध्ये २९ ऑक्टोबर २०१९ रोजी होणाऱ्या विशेष समारंभात या रुग्णालयाचा सन्मान होणार आहे. राणी एलिझाबेथ यांच्या उपस्थितीत होणाऱ्या या सोहळ्यात डॉ. सुचेता कुलकर्णी हा सन्मान स्वीकारणार आहेत.
एच. व्ही. देसाई नेत्र रुग्णालयाने रेटिनोपॅथी ऑफ प्रिमच्युरिटी या लहान बाळांना अंधत्व आणणाऱ्या विकारावर उपचार मोहीम राबवून तीन वर्षांत दोन हजारांहून अधिक बाळांना कायमच्या अंधत्वापासून वाचवले आहे. त्यांच्या या कामाचे एलिझाबेथ यांनी कौतुक केले आहे.
क्वीन एलिझाबेथ डायमंड ज्युबिली ट्रस्टने लाखो लोकांच्या डोळ्याचे आरोग्य सुधारण्यासाठी अनेक कॉमनवेल्थ देशांमध्ये काम केले आहे. भारत या समूहाचा सर्वात मोठा सदस्य आहे. एच. व्ही. देसाई नेत्र रुग्णालय, एलिझाबेथ ट्रस्ट व राज्य आरोग्य विभागाने रेटिनोपॅथी ऑफ प्रिमच्युरिटी या लहान बाळांमध्ये आढळणाऱ्या रोगाची तपासणी व इलाज करण्यासाठी महाराष्ट्रातील पाच जिल्ह्यांमधील सरकारी डॉक्टरांना प्रशिक्षण दिले. डॉ. सुचेता कुलकर्णी यांनी या मोहिमेचे नेतृत्व केले. या पथकाने तीन वर्षांत दोन हजारांहून अधिक बाळांची तपासणी केली आणि त्यांना कायमच्या अंधत्वापासून वाचवले.